| പ്രേക്ഷകരുടെ സ്വന്തം വായാടിക്കുട്ടി |
|
ഹലോ... ആരാണ് സംസാരിക്കുന്നത്? ഏതു പാട്ടാണ് വേണ്ടത്? ആര്ക്കെങ്കിലും ഡെഡിക്കേറ്റ് ചെയ്യുന്നുണ്ടോ?... ലക്ഷക്കണക്കിന് മലയാളി പ്രേക്ഷകര്ക്ക് പരിചിതമായ ഈ ഡയലോഗുകള് ധാരാളമുണ്ട് നമ്മുടെ ചാനലുകളില്. എന്നാല് ഏഷ്യാനെറ്റ് പ്ലസിലെ 'ഫ്രഷ് എന് ലൈവ്' എന്ന പ്രോഗ്രാമിലെ ഒരു കിളിക്കൊഞ്ചല് പ്രേക്ഷകര്ക്ക് ഏറ്റവും പ്രിയങ്കരമായി. അതിനൊരു കാരണമുണ്ട്. ലൈവ് ഫോണ് ഇന് പ്രോഗ്രാമില് ലഭിക്കുന്ന ഒരു മിനുട്ട് സമയം പ്രേക്ഷകരെയും ഫോണ് വിളിക്കുന്ന ആളെയും ഒരുപോലെ എന്റര്ടൈന് ചെയ്യണം. നിര്ത്താതെ വാചകമടിക്കാനും പ്രേക്ഷകനെ കയ്യിലെടുക്കാനുള്ള അസാമാന്യ കഴിവും വേണം. ഇങ്ങനെ വാചകമടിയിലൂടെ നാടറിയുന്ന ശബ്ദത്തിനുടമയായ താരമാണ് ശാന്തി. ഏഷ്യാനെറ്റ് പ്ലസിലെ ഫ്രഷ് എന് ലൈവ് പരിപാടിയിലൂടെ ഒരു മണിക്കൂര് പ്രേക്ഷകരെയും ആരാധകരെയും പിടിച്ചിരുത്താന് ശാന്തിക്ക് വാചകമടി മാത്രം മതി. ആറ് വര്ഷം മുന്പാണ് ഈ തിരുവനന്തപുരത്തുകാരിയുടെ വാചകമടി മലയാളിക്ക് പരിചിതമായത്. എം.ജി.കോളെജ് വിദ്യാര്ഥിനിയായിരിക്കെ പ്രൊഡ്യൂസര് ഹരി പി നായരാണ് ശാന്തിയെ ആങ്കറിംഗ് രംഗത്തേക്ക് കണ്ടെത്തിയത്.
ആദ്യ പരിപാടി ചലച്ചിത്രാധിഷ്ഠിതമായ 'ഫ്രെയിംസ്'. ആദ്യ പരിപാടിയില് തന്നെ മലയാളികളുടെ പ്രിയപ്പെട്ട ലാലേട്ടനെ ഫോണ് - ഇന് - പരിപാടിയിലെ വാചകമടിയിലൂടെ വീഴ്ത്തി. പിന്നീട് ടീനേജിന്റെ ഹൃദയത്തിലേക്ക് കടന്നുചെന്ന മിസ്റ്റ്, സാവരിയ തുടങ്ങിയ പ്രോഗ്രാമുകളുടെ അവതാരകയായി. അഞ്ചോളം പ്രോഗ്രാമുകളാണ് ശാന്തി ആറുവര്ഷത്തിനിടയില് അവതരിപ്പിച്ചത്. ചാനലിലെ വാചകമടി കേട്ടിട്ടാകണം നിരവധി മെഗാ ഈവന്റുകളുടെ കോംപയററായി ഈ താരം മലയാളിയുടെ സ്വീകരണമുറിയില് നിന്നും വേദികളിലേക്കെത്തി. ഈവന്റാകുമ്പോള് കഴിവുകള് നന്നായി പ്രകടിപ്പിക്കാന് കഴിയുമെന്ന് ശാന്തി പറയുന്നു. ലൈവ് ഇന് ആകുമ്പോള് ചില പരിമിതികളൊക്കെയുണ്ട്. 'പക്ഷേ മാസ്റ്റര് ഓഫ് സെറിമണി എന്ന ലേബലില് ശരിക്കും എന്ജോയ് ചെയ്യാന് കഴിയും.'
ഇപ്പോള് തിരുവനന്തപുരത്ത് നടക്കുന്ന കെ.എസ്.യു സമരങ്ങളുടെ മുന്പന്തിയില് ശാന്തിയുണ്ടാകും. രാഹുല്ഗാന്ധിയെ യൂത്ത് ഐക്കണായി കാണുന്ന ശാന്തി തീര്ത്തു പറയുന്നു - 'രാഹുല്ഗാന്ധിയുടെ പ്രവര്ത്തനങ്ങളിലും പ്രസംഗങ്ങളിലും ആകൃഷ്ടരായാണ് വിദ്യാര്ഥികളില് നല്ലൊരു വിഭാഗം രാഷ്ട്രീയത്തെ ഇഷ്ടപ്പെട്ടു തുടങ്ങിയത്.' ടാലന്റ് ഉള്ളവരെ രാഷ്ട്രീയ പ്രവര്ത്തനത്തിലേക്ക് ആകര്ഷിക്കുമെന്ന രാഹുലിന്റെ അഭിപ്രായത്തോട് ശാന്തി 100 ശതമാനം യോജിക്കുന്നു.ബിസിനസുകാരനായ വിമലിന്റെയും മായയുടെയും രണ്ടാമത്തെ മകളാണ് ശാന്തി. ഇപ്പോള് രണ്ടാം വര്ഷ എല്.എല്.ബി വിദ്യാര്ഥിനി. സഹോദരന് ഹരി എം.സി.എയ്ക്ക് പഠിക്കുന്നു. അച്ഛനാണ് എല്ലാ പ്രോത്സാഹനവും നല്കുന്നതെന്ന് പറയുന്ന ശാന്തിക്ക് പക്ഷേ എന്തിനും അമ്മ കൂടെ വേണം.
ഇതിനിടെ കോളെജില് വൈസ് ചെയര്പേഴ്സണായി മത്സരിച്ചതും അച്ഛന്റെ പിന്തുണയോടെയായിരുന്നു. ഏഷ്യാനെറ്റിനു പുറമേ ബെസ്റ്റ് എഫ്.എം-95 റേഡിയോ പ്രേക്ഷകരുടെ പ്രിയ 'ചക്കര' കൂടിയാണ് ശാന്തി. വ്യാഴവും വെള്ളിയും വൈകിട്ട് അഞ്ചുമുതല് ആറുവരെയാണ് ശാന്തിയുടെ ഫ്രെഷ് എന് ഹിറ്റ്സ് സംപ്രേഷണം ചെയ്യുന്നത്. |
ലോകമെമ്പാടുമുള്ള മലയാളികളുടെ സായാഹ്നത്തെ സംഗീതസാന്ദ്രമാക്കുന്ന ഏഷ്യാനെറ്റ് പ്ലസിലെ | < മുന് പേജ് | അടുത്തത് > |
|---|
-°C 