| ഒരു ഹ്യൂമന് മാനിഫെസ്റ്റോ-2 |
|
ഇ.വി ശ്രീധരന് ലോകത്തിന്റെ പൊലീസുകാരന് ചമഞ്ഞുനടക്കുന്ന അമേരിക്കന് സാമ്രാജ്യത്വം മുസ്ലീങ്ങളെയെല്ലാം ടെററിസ്റ്റുകളായി മുദ്രകുത്തുന്ന രാക്ഷസീയത മൈ നെയിം ഈസ് ഖാന് എന്ന സത്യം കൊണ്ട്, നല്ല മുസ്ലീമിന്റെ മനസ്സുകൊണ്ട് നേരിടുകയാണ് അമേരിക്കയുടെ മണ്ണില്വച്ചു തന്നെ റിസ്വാന് ഖാന്. ഓട്ടിസം എന്ന മനോവൈകല്യത്തെ ദൈവത്തിലും സത്യത്തിലുമുള്ള അഗാധമായ വിശ്വാസത്തിലൂടെ റിസ്വാന് ഖാന്. റിസ്വാന്റെ സ്വത്വത്തിലെ സത്യമാണ് മൈ നെയിം ഈസ് ഖാന് എന്ന് വിളിച്ചു പറയുന്നത്.
ലോകത്തുണ്ടാവുന്ന എല്ലാ ടെററിസങ്ങളെയും അമേരിക്ക ലോകമനഃസാക്ഷിയെ കബളിപ്പിച്ച് സ്വാഗതം ചെയ്യുകയും പ്രോത്സാഹിപ്പിക്കുകയും ചെയ്യുന്നു. അമേരിക്കന് സാമ്രാജ്യത്വ ടെററിസത്തിന്റെ ആഹാരങ്ങളാണ് മേറ്റ്ല്ലാ ടെററിസങ്ങളും. ടെററിസത്തിനെതിരെ മുറവിളിയുയര്ത്തുന്ന അമേരിക്കയുടെ യഥാര്ത്ഥ ആവശ്യം ടെററിസത്തിന്റെ നൂറു പൂക്കളാണ്. എന്നിട്ട് ടെററിസത്തിന്റെ നാമത്തില് എല്ലാ രാജ്യങ്ങളിലും ഇടപെടണം. നമ്മുടെ ലോകത്ത് ഇന്ന് പലതരം ടെററിസങ്ങളുണ്ട്. ഇസ്ലാമിക ടെററിസങ്ങള് ലോകത്തെ വിറപ്പിക്കുകയുമാണ്. എന്നാല് ഇസ്ലാമിക ടെററിസം ഇസ്ലാം വാദത്തിന്റെ സൃഷ്ടിയല്ല. ഇസ്ലാമിക ടെററിസങ്ങളെ നേരിടാനും സംഹരിക്കാനും അമേരിക്കയെ ആരും ഏല്പ്പിച്ചിട്ടില്ല.
ഇസ്ലാമിക ടെററിസത്തെ നേരിടേണ്ടത് ഇസ്ലാമിസവും ഇസ്ലാം ലോകവുമാണ്. അല്ലെങ്കില് ടെററിസത്തിന്റെ പ്രശ്നം ലോകത്തെ ഇരുന്നൂറിലധികം രാജ്യങ്ങളുടെ പ്രശ്നമാണ്. ഈ ഇരുന്നൂറ് ലോകരാഷ്ട്രങ്ങളുടെ അധിപനോ രക്ഷകനോ അല്ല അമേരിക്ക. ടെററിസത്തിന്റെ കാര്യത്തില് അമേരിക്കയ്ക്കു മാത്രമായി ലോകത്ത് ഒന്നും നിറവേറ്റാനില്ല. അമേരിക്കയുടെ ലോകരക്ഷകന്റെ വേഷം ടെററിസത്തിന്റെ പ്രശ്നങ്ങള് കൂടുതല് ഭീകരവല്ക്കരിക്കുകയാണ്. എല്ലാ മുസ്ലീങ്ങളെയും അമേരിക്കന് പൗരന്മാരുടെ മുമ്പില് ഭീകരന്മാരാക്കി മാറ്റുന്നു. വ്യക്തികളില് സാമ്രാജ്യത്വ മനോഭാവം കുത്തിവെക്കുന്നു.
ബിസിനസ്സില് സഹോദരന് സഹായത്തിനായി മുംബൈയില് നിന്ന് അമേരിക്കയിലെത്തുന്ന ഒരു യുവാവിന്റെ ജീവിതത്തിലൂടെ അമേരിക്കന് ഭീകരവേട്ടയുടെ മറുകഥ പറയുകയാണ് കരണ് ജോഹറിന്റെ മൈ നെയിം ഈസ് ഖാന്.ഓട്ടിസം എന്ന രോഗം ബാധിച്ച് അല്പ്പം മനോവൈകല്യമുള്ള ഒരാളാണ് റിസ്വാന് ഖാന്. ഈ രോഗം ഒരു മനുഷ്യജീവിക്ക് ഉണ്ടാകുന്ന കടുത്ത നിസ്സഹായതയും നിര്ഭാഗ്യവുമാണ്. റിസ്വാന്റെ രോഗത്തെക്കുറിച്ച് ഇവിടെ അല്പ്പം വിശദീകരിക്കേണ്ടതുണ്ട്. റിസ്വാന്റെ രോഗം ഈ സിനിമയുടെ കലാപരമായ ഉജ്ജ്വലതയാണ്. ഷാരൂഖ് ഖാനും കജോളിനും അഭിനയത്തിന്റെ അപാരസാധ്യതകള് ഒരുക്കിക്കൊടുക്കുന്നത് റിസ്വാന് ഖാന്റെ ഓട്ടിസം ആണ്. സിനിമയില് സജീവമായി അലിഞ്ഞുചേര്ന്നിരിക്കുന്നു റിസ്വാന് ഖാന്റെ ഓട്ടിസം എന്ന മാറാത്ത രോഗം. ഷാരൂഖ് ഖാന്റെ അഭിനയത്തിന് മാറ്റുകൂട്ടുന്നത് ഈ രോഗമാണ്.
മോട്ടോര് മെക്കാനിസം, വാച്ച് റിപ്പയറിംഗ്, കളിപ്പാട്ടങ്ങളുണ്ടാക്കല് എന്നീ കാര്യങ്ങളില് ഓട്ടിസ്റ്റുകള് താല്പ്പര്യമെടുക്കുന്നതു കാണാം. ചെറിയ ശതമാനം രോഗികള് മികച്ച ബുദ്ധിവൈഭവമുള്ളവരായിരിക്കും. എന്നാല് ഇവരില് നിന്ന് എഴുത്തുകാരും കലാകാരന്മാരുമൊന്നുമുണ്ടാകില്ല. സ്വന്തം നിര്ബന്ധങ്ങളിലൂടെ നീങ്ങുന്ന നിസ്സഹായരായ മനുഷ്യജീവികള്. ഈ നിസ്സഹായ മനുഷ്യജീവികളില് നിന്നൊരാള് അമേരിക്കന് സാമ്രാജ്യത്വ ടെററിസത്തിന്റെ മുഖംമൂടി വലിച്ചുകീറുന്നു. റിസ്വാന് ഖാന് എന്ന ഒരു നല്ല മുസ്ലിം. മുസ്ലീങ്ങളെയെല്ലാം ടെററിസ്റ്റുകളായി ചിത്രീകരിക്കുന്ന അമേരിക്കന് മനസ്സിനോടാണ് റിസ്വാന് പൊരുതുന്നത് - ഞാന് ഒരു ഖാനാണ്, ടെററിസ്റ്റല്ല എന്നു പ്രഖ്യാപിച്ചുകൊണ്ട്.
സാമ്രാജ്യത്വ ടെററിസത്തിന്റെ ലോകതലവനായ അമേരിക്കയുടെ ഭീമന് മസ്തിഷ്കത്തോടാണ് ഓട്ടിസം ബാധിച്ച് ദുര്ബലമായിത്തീര്ന്ന എന്നാല് സര്വശക്തനായ ദൈവം കുടിയിരിക്കുന്ന മസ്തിഷ്കം കൊണ്ട് റിസ്വാന് ഖാന് പൊരുതുന്നത്. ഈ പൊരുതല് അമേരിക്കയില് വിമാനമിറങ്ങുമ്പോള്ത്തന്നെ തുടങ്ങുന്നു.ഒരു കുട്ടിയുള്ള മന്ദിര എന്ന ഹിന്ദുയുവതിയെ വിവാഹം ചെയ്ത് സന്തോഷകരമായി നീങ്ങുന്ന റിസ്വാന്റെ ജീവിതം വേള്ഡ് ട്രേഡ് സെന്റര് ഭീകരാക്രമണത്തില് തകരുന്നതോടെ തകിടം മറിയുന്നു. പോകുന്നേടത്തെല്ലാം റിസ്വാന് മുസ്ലീമായി അകറ്റപ്പെടുന്നു. എന്തിന് മന്ദിരയുടെ കുട്ടിപോലും അവര്ക്ക് മുസ്ലീമാണ്. അവന്റെ ഉറ്റ അമേരിക്കന് ചങ്ങാതിയും മുസ്ലിമായതുകൊണ്ട് അവനെ കൈവിടുന്നു.
വെള്ളക്കാരന് ചങ്ങാതിയുടെ മുമ്പില്വച്ചുതന്നെ അവന് ഒരുകൂട്ടം വെള്ളക്കാരുടെ ആക്രമണത്തില് കൊല്ലപ്പെടുന്നു. മകന് നഷ്ടപ്പെട്ട വിഭ്രാന്തിയില് മന്ദിര റിസ്വാനോട് പോയ്ക്കൊള്ളാന് പറയുകയാണ് - പരാതിയുണ്ടെങ്കില് പോയി പ്രസിഡന്റിനോടു പറയാനും.പ്രസിഡന്റിനോട് റിസ്വാന് ഒന്നേ പറയാനുള്ളൂ- "എന്റെ പേര് ഖാന്, ഞാനൊരു ഭീകരനല്ല."പ്രസിഡന്റ് പങ്കെടുക്കുന്ന യോഗങ്ങള് തേടിയുള്ള യാത്രക്കിടയില് റിസ്വാന് ഭീകരനായി സംശയിക്കപ്പെടുന്നു. 'എനിക്ക് പ്രസിഡന്റിനെ കാണണം' എന്നു വിളിച്ചു പറയുന്ന റിസ്വാന്റെ ഉദ്ദേശ്യമെന്തെന്ന് പൊലീസിനറിയണം. കഠിന പീഡനങ്ങള്ക്കൊടുവില് മന്ദിരയുടെ കൂടി സാക്ഷിമൊഴിയോടെ റിസ്വാന് മോചിതനാവുന്നു.
എല്ലാവര്ക്കും അപ്പുറത്ത് ഷാറൂഖിന്റെയും കജോളിന്റെയും അഭിനയ വിശേഷം ഈ ഫിലിമിന്റെ ധന്യത.ഖാന് ഉണ്ടായത് ഷാരൂഖ് ഖാന്റെ പീഡിപ്പിക്കപ്പെട്ട ഒരനുഭവത്തില് നിന്നുതന്നെയാണ്. അമേരിക്കയിലെ നെവാര്ക് വിമാനത്താവളത്തിലെ സുരക്ഷാ ഉദ്യോഗസ്ഥര് ഷാരൂഖ് ഖാനെ, ഒരു ഖാനായതുകൊണ്ട് പരിശോധിച്ച് പീഡിപ്പിച്ച സ്വാനുഭവത്തില് നിന്ന്. സാമ്രാജ്യത്വത്തിന്റെ ഈ മൃഗീയതയോടാണ് ഷാരൂഖ് ഖാന്, സിനിമയില് റിസ്വാന് ഖാന്റെ വേഷമിട്ടുകൊണ്ട് പറയുന്നത്: "എന്റെ പേര് ഖാന്, ഞാനൊരു ഭീകരനല്ല." ഇതൊരു സിനിമ മാത്രമല്ല, ഇതൊരു ഹ്യൂമന് മാനിഫെസ്റ്റോയാണ്.
|
എന്തുകൊണ്ട് 'മൈ നെയിം ഈസ് ഖാന്'?| < മുന് പേജ് | അടുത്തത് > |
|---|
-°C 