| പൗരസമൂഹം ഉണരുന്നു |
|
രുചിക ഗിര്ഹോത്രാ എന്ന നിര്ഭാഗ്യവതിയായ പെണ്കുട്ടിയുടെ ജീവിതം കുട്ടിച്ചോറാക്കിയതിന് മുന് ഹരിയാന ഡിജിപി: എസ്.പി.എസ്. റാത്തോര് വര്ഷങ്ങളോളം ജയിലഴിക്കുള്ളിലായേക്കാം. എന്നാല് അതിന് വഴിയൊരുക്കുന്നത് നിലവിലുള്ള നിയമമോ, അത് നടപ്പാക്കേണ്ട ഔദ്യോഗിക ഏജന്സികളോ അല്ല. രണ്ട് ദശാബ്ദങ്ങളോളം നിയമവ്യവസ്ഥ ചുറ്റിക്കളിച്ചിട്ടും വെറും ആറുമാസത്തെ ജയില് ശിക്ഷയേ റാത്തോഡിന് ആദ്യം ലഭിച്ചുള്ളു. അതില്നിന്ന് അദ്ദേഹം ജാമ്യം മൂലം തല്ക്കാലത്തേക്ക് രക്ഷപ്പെടുകയും ചെയ്തു. ഒരുപക്ഷേ കേസില് അപ്പീലും അതിന്മേല് അപ്പീലുമായി റാത്തോറിന് നൂറുവയസ്സുവരെ സുഖമായി ജീവിക്കാന് നമ്മുടെ നിയമവ്യവസ്ഥ അവസരമൊരുക്കിയെന്നുവരാം. നമ്മുടെ നിയമവ്യവസ്ഥയുടെ ജീര്ണ്ണമായ മുഖമാണിത്. മാധ്യമങ്ങളുടെ ജാഗ്രതയും പൊതുസമൂഹത്തിന്റെ ഉയര്ത്തെഴുനേല്പ്പും മൂലമാണ് അതിനുമുമ്പ് ദേശീയ മനസ്സാക്ഷിയുടെ മുന്നില് ഈ പൊലീസ് ഓഫീസര് ഒരു കുറ്റവാളിയായി തന്റെ വികൃതമുഖം പ്രദര്ശിപ്പിച്ചുനില്ക്കുന്നത്.
ഏട്ടിലെ നിയമത്തിന്റെ ശക്തിയെക്കുറിച്ച് വാദിക്കുന്നവര് അമേരിക്കയിലെ എഴുപതുകളിലെ സ്ഥിതി പരിശോധിക്കേണ്ടതാണ്. അക്കാലത്ത് ലോകത്തില് ഏറ്റവുമധികം തടവുകാര് ഉണ്ടായിരുന്നത് അമേരിക്കയിലായിരുന്നു. എല്ലാ കുറ്റങ്ങള്ക്കും യാതോരു വിവേചനമില്ലാതെ ശിക്ഷയായിരുന്നു അവിടെ. ഫലമോ തടവറയിലേക്ക് കുറ്റവാളികളുടെ ഒഴുക്കായിരുന്നു. നിയമം നടപ്പാക്കുന്നതില് യാതൊരു അലംഭാവവും അവര് കാണിച്ചില്ല.
'കത്രീന' ആഞ്ഞുവീശിയ ന്യൂഓര്ലിയന്സില് ദുരന്തങ്ങള്ക്ക് നടുവിലും കൊള്ളയും കിഡ്നാപ്പിങ്ങും അരങ്ങേറിയത് ആര്ക്ക് മറക്കാന് കഴിയും. എന്നാല് ഇപ്പോള് അമേരിക്കയില് കുറ്റകൃത്യങ്ങള് പൊതുവില് കുറഞ്ഞു എന്നത് ഒരു വസ്തുതയാണ്. കടുത്ത നിയമങ്ങളുടെ പശ്ചാത്തലത്തിലല്ല, മറിച്ച് സാമൂഹികമായ ചില മുന്നേറ്റങ്ങളുടെ ഫലം കൊണ്ടാണത് ഉണ്ടായത്. സ്ത്രീകള്ക്കെതിരായ ആക്രമണങ്ങള് കുറഞ്ഞു. അതുപോലെതന്നെ ആഫ്രിക്കന് വംശജര്ക്കെതിരെയുള്ള കയ്യേറ്റങ്ങളും വിരളമാണ്. കുടുംബവഴക്കുകളും പണിസ്ഥലത്തും വീടുകളിലും സ്ത്രീകള് അനുഭവിച്ചിരുന്ന പീഡനങ്ങളും കുറവുണ്ട്. പൗരസമൂഹത്തിന്റെ ഉണര്വും അവബോധവും കൊണ്ടാണ് അമേരിക്ക ഇത്തരത്തില് ഒരുനേട്ടമുണ്ടാക്കിയത്. അവിടുത്തെ നിയമവ്യവസ്ഥയുടെ മാത്രം വിജയമായി അതിനെ കണ്ടുകൂടാ. ജനങ്ങള് മാധ്യമശക്തി ഉപയോഗിച്ച് ചെറുത്തപ്പോള് നിയമത്തിന്റെ പിന്ബലവും സ്വാഭാവികമായും ലഭിച്ചു.
നിയമങ്ങള് ഉപയോഗിച്ച് വ്യക്തികളുടെ അവകാശങ്ങള് കവര്ന്നെടുക്കാത്ത ഇന്ത്യയ്ക്കു മാത്രമെ പരിഷ്കൃത ലോകത്തേക്ക് വളരാനാകൂ. 1947ല് ലഭിച്ച സ്വാതന്ത്ര്യത്തിന് എങ്കില് മാത്രമേ അര്ത്ഥമുണ്ടാവുകയുള്ളൂ. |
എം.ഡി. നാലപ്പാട്| < മുന് പേജ് | അടുത്തത് > |
|---|
-°C 