| കയ്യേറ്റ സമരം: സി പി എം പുലിവാല് പിടിക്കുന്നു |
|
കയ്യേറ്റങ്ങള്ക്ക് രാഷ്ട്രീയ പകപോക്കലിന്റെ നിറം കലര്ന്നതും ഇത് സൃഷ്ടിക്കുന്ന ക്രമസമാധാന പ്രശ്നങ്ങളുമാണ് സി പി എമ്മിനെ വിഷമവൃത്തത്തിലാക്കുന്നത്.മുന്കാലങ്ങളില് നടന്ന മിച്ചഭൂമി സമരങ്ങളുടെ തീവ്രതയും പ്രതിബദ്ധതയുമില്ലാത്ത പ്രഹസന സമരങ്ങളാണ് ഇപ്പോള് വയനാട്ടില് നടന്നു വരുന്നത്. ആദിവാസി ഭൂപ്രശ്നം പൊള്ളുന്ന വിഷയമായിരിക്കെ ഭരണകക്ഷി എന്ന നിലയില് അതില് പിടിച്ചു സമരത്തിനിറങ്ങിയത് വലിയ വങ്കത്തമായിപ്പോയെന്ന തിരിച്ചറിവ് കയ്യേറ്റ സമരങ്ങള് അവസാനിപ്പിക്കണം എന്ന തീരുമാനത്തിലേക്ക് പാര്ട്ടിയെ നയിക്കുകയാണ്. വയനാട്ടിലെ കയ്യേറ്റങ്ങള്ക്കെതിരെ സി പി ഐയും ആര് എസ് പിയും നിലപാടെടുത്തതും സി പി എമ്മിനെ വെട്ടിലാക്കിയിട്ടുണ്ട്.
നിയമവിരുദ്ധമായി ഭൂമി കയ്യേറി ആധിപത്യം സ്ഥാപിക്കാനൊരുങ്ങുന്നത് സംസ്ഥാനത്തെ അരാജകത്വത്തിലേക്ക് നയിക്കുമെന്ന് ഇടത് മുന്നണിയിലെ മറ്റു ഘടകകക്ഷികളും കരുതുന്നു. ഭരണത്തിന് നേതൃത്വം നല്കുന്ന പാര്ട്ടി നിയമവിരുദ്ധ പോരാട്ടത്തിനിറങ്ങുന്നത് നിയമവാഴ്ചയോടുള്ള അനാദരവായാണ് പൊതുസമൂഹം കാണുന്നത്. ആദിവാസികളെ ഭൂമിക്ക് ഉടമകളാക്കുകയല്ല; വീരേന്ദ്രകുമാറിനെയും അദ്ദേഹത്തിന്റെ പാര്ട്ടിയെയും പാഠം പഠിപ്പിക്കുക എന്ന അവിശുദ്ധ ലക്ഷ്യമാണ് സമരത്തിന് പിന്നിലെന്ന് പ്രതിപക്ഷം മാത്രമല്ല; ഇടത് മുന്നണിയിലെ ഘടകക്ഷികളും വിശ്വസിക്കുന്നു.
പാര്ട്ടി നേതാക്കളുടെ സമ്മര്ദ്ദവും പ്രലോഭനങ്ങളും സാമ്പത്തിക സഹായങ്ങളും കൊണ്ടാണ് പലരും ഇന്ന് സമരമുഖത്ത് നില്ക്കുന്നത്. കയ്യേറ്റം നടത്തിയാല് കേസുണ്ടാവില്ലെന്നും ഭരണകക്ഷിയുടെ പൊലീസ് കയ്യേറ്റത്തിന് കാവല് നില്ക്കുന്നവരാണെന്നുമാണ് പാര്ട്ടി നേതാക്കള് ആദിവാസികളെ ധരിപ്പിച്ചിരിക്കുന്നത്. കയ്യേറ്റങ്ങള് കോടതിയിലെത്തിയതോടെ കോടതി വിധിയുടെ മറവില് സമരത്തില് നിന്നും തലയൂരാനുള്ള ആലോചനകളും പാര്ട്ടിയില് സജീവമാണ്.സമരത്തിന് നേതൃത്വം നല്കുന്ന പല സി പി എം നേതാക്കളും കുടുംബങ്ങളും നൂറ് കണക്കിന് ഏക്കര് സര്ക്കാര് ഭൂമി കയ്യേറിയിട്ടുണ്ടെന്ന ശക്തമായ ആരോപണം സി പി എമ്മിന്റെ കയ്യേറ്റ സമരത്തിന്റെ ഉദ്ദേശശുദ്ധിയെ തന്നെ ചോദ്യം ചെയ്യുന്നു.
ഭരണകക്ഷിയുടെ കയ്യേറ്റത്തെ കാവലിരുന്ന് സംരക്ഷിക്കുകയും പ്രതിപക്ഷത്തിന്റെ സമരത്തെ അടിച്ചമര്ത്തി സംഹരിക്കുകയും ചെയ്യുന്ന നിലപാടെടുക്കാന് പൊലീസ് സേന നിര്ബന്ധിതമാകും. ഇത് സംസ്ഥാനത്ത് വലിയ ക്രമസമാധാന തകര്ച്ചയ്ക്ക് കാരണമാകുമെന്നും വിശ്വസിക്കുന്നവരുടെ ചിന്തയിലാണ് കയ്യേറ്റ സമരം അവസാനിപ്പിക്കാനുള്ള ശ്രമം രൂപം കൊള്ളുന്നത്. സര്ക്കാര് ഭൂമി കൈവശം വെച്ചുകൊണ്ടിരിക്കുന്ന സി പി എം നേതാക്കളുടെ ഭൂമിയിലേക്ക് യു ഡി എഫ് സമരത്തിനെത്തുമോ എന്ന ഭീതിയും പാര്ട്ടി നേതൃത്വത്തിനിടയില് പടര്ന്നു പിടിച്ചിട്ടുണ്ട്. സി പി എം ഭൂമി പിടിച്ചെടുത്ത് തങ്ങള്ക്ക് കൂരവെയ്ക്കാന് ഇടം നല്കുമെന്ന് വിശ്വസിക്കുന്നവരല്ല സമരത്തിനെത്തിയ ആദിവാസികളില് ഭൂരിപക്ഷവും. ഒരു ദിവസത്തെ കയ്യേറ്റ സമരത്തിന് പോയാല് ലഭ്യമാകുന്ന ആനുകൂല്യങ്ങളാണ് ചെങ്കൊടി കെട്ടിയ വണ്ടിയില് കയറാന് ആദിവാസികളെ പ്രേരിപ്പിച്ചത്.
|
പി മുഹമ്മദലി| < മുന് പേജ് | അടുത്തത് > |
|---|
-°C 