| കമ്യൂണിസ്റ്റ് ഭീകരത |
|
"ചെറുപ്പത്തില് കമ്യൂണിസ്റ്റാവാത്ത ബുദ്ധിമാന്മാര് ഇല്ല. 40 വയസ്സിലെത്തുമ്പോഴേയ്ക്കും ബുദ്ധി നശിച്ചിട്ടില്ലെങ്കില് അവര് പുറത്തുവരികയും ചെയ്യും" എന്ന് പറയാറുണ്ട്. ഇരുപതാം നൂറ്റാണ്ടിലെ സത്യാനുഭവം അതായിരുന്നു. ബുദ്ധിയുള്ളവരില് കുറച്ചൊക്കെ ആത്മാഭിമാനവും കാണും. പാര്ട്ടിക്കുള്ളിലെ വിധേയത്വവും അഴിമതിയും വിഭാഗീയതയും-അതൊക്കെ മറ്റു പാര്ട്ടികളില് എല്ലാത്തിലും കുറച്ചുണ്ടാകാമെങ്കിലും-പ്രത്യയശാസ്ത്ര സ്വഭാവം കൊണ്ട് അങ്ങേയറ്റം പ്രോത്സാഹിപ്പിക്കപ്പെടുന്നത് കമ്യൂണിസ്റ്റ് കക്ഷികളിലാണ്. കണ്ടുമടുക്കുമ്പോള് ബുദ്ധി നശിച്ചിട്ടില്ലെങ്കില് എല്ലാവരും പുറത്തുചാടാന് ഒരുങ്ങും. ചിലര് അപ്പോഴേയ്ക്കും വലിയ സ്ഥാനമാനങ്ങളും സ്വത്തുക്കളും വ്യക്തി-കുടുംബബന്ധങ്ങളും സ്ഥാപിതതാല്പര്യങ്ങളും വളര്ത്തിക്കഴിഞ്ഞിരിക്കും. അതുകൊണ്ട് അവര്ക്ക് പുറത്തുവരുന്നത് വന്നഷ്ടമുണ്ടാക്കും. പിന്നെ മനഃസാക്ഷിയെ ഞെക്കിക്കൊന്ന് രാക്ഷസന്മാരായി പാര്ട്ടിയില് തുടരുകയും ചെയ്യും. തങ്ങളുടെ മനുഷ്യത്വവും ആദര്ശവും കുറേ ബാക്കിവച്ചിട്ടുള്ളവരാണ് യഥാര്ത്ഥത്തില് വേലി, അഥവാ അദൃശ്യമായ ഇരുമ്പുമറ പൊളിച്ചുപുറത്തുചാടുന്നത്. എന്തായാലും അത്തരക്കാര് ഒരു പുനര്ജന്മമാണ് സമ്പാദിക്കുന്നത്.
പുറമേയ്ക്ക് മാന്യന്മാരായി നടിച്ചുകൊണ്ട് പാര്ട്ടിക്കാര് നടത്തുന്ന സ്വഭാവഹത്യാശ്രമങ്ങള് പറഞ്ഞാല് മറ്റുള്ളവര്ക്ക് അവിശ്വാസ്യമായിത്തോന്നും. കാരണം കമ്യൂണിസ്റ്റുകള് ഇരട്ടവ്യക്തിത്വം സാമര്ത്ഥ്യമാണെന്ന് വിചാരിക്കുന്നവരാണ്. അവിടെയാണ് പലയിടത്തും, സര്ക്കാര്കേന്ദ്രങ്ങളിലടക്കം, രഹസ്യബന്ധങ്ങളുള്ള അക്രമസജ്ജരായ ഗുണ്ടകളുടെ അകമ്പടിയുള്ള, നേതാക്കളുടെ വിജയം കുടികൊള്ളുന്നത്. പുറത്തുവരുന്നവര് പ്രശസ്തരും സമ്പന്നരുമാണെങ്കില് ഒരുവിധത്തില് ജീവനുംകൊണ്ട് രക്ഷപ്പെട്ടുവെന്നുവരും. അല്ലെങ്കില് അടിഞ്ഞുപോകും. ഫാസിസ്റ്റ് എന്ന് കമ്യൂണിസ്റ്റുകള് ആക്ഷേപിക്കുന്നവരേക്കാള് നീചവും നിഷ്ഠൂരവുമാണ് കമ്യൂണിസ്റ്റുകളുടെ തന്ത്രങ്ങള്. തെളിവുകള് നശിപ്പിക്കുന്നതിലും ഉന്മൂലനത്തിലും അവര് വിദഗ്ധരാണെന്ന് റഷ്യന്-ചൈനീസ് അനുഭവം കഴിഞ്ഞ തലമുറയില് തന്നെ വ്യക്തമാക്കിയിരുന്നു.
മതങ്ങളെ നശിപ്പിക്കാനുള്ള വഴി ദേവാലയക്കമ്മിറ്റികളില് കടന്നുകൂടുകയാണ്. സാഹിത്യത്തെ നശിപ്പിക്കാന് സാഹിത്യസമിതികള്, കലയെ നശിപ്പിക്കാന് കലാസമിതികള്, അങ്ങിനെ എല്ലാറ്റിലും കടന്നുകയറി ആധിപത്യം സ്ഥാപിക്കണം. തങ്ങളുടെ പാര്ട്ടിയൊഴിച്ച് ഒന്നിനും സമൂഹത്തില് പ്രവര്ത്തിക്കാന് കഴിയാതാക്കണം.ഐക്യമുന്നണിയും ഇതുപോലെ ഒരു തന്ത്രത്തിലാണ്. ഏതെങ്കിലും കക്ഷിയെ കൂട്ടുപിടിക്കുന്നത് അവരുമായി നിത്യസൗഹൃദം വളര്ത്താനല്ലാ ശോഷിപ്പിച്ച് ശോഷിപ്പിച്ച്, അവരുടെ അണികളില് ഛിദ്രം വരുത്തി, അവരുടെ മാര്ഗ്ഗം തെറ്റാണെന്ന് വരുത്തി, അവരെ ഉന്മൂലനാശം (ഹശൂൌശറമശ്ി) ചെയ്യാനാണ്. കേരളത്തില് സോഷ്യലിസ്റ്റ് കക്ഷികള് ഏതാണ്ടില്ലാതായി; കമ്യൂണിസ്റ്റ് കക്ഷികള് അടുത്തപടി; പിന്നെ ഇടതുപക്ഷം തന്നെ വേണ്ടിവരില്ല.
അധികാരത്തിലെത്തിയാല് അതെല്ലാം മറന്ന് അസഹിഷ്ണുതയോടെ വിമര്ശകരെ അടിച്ചമര്ത്താനും മാധ്യമങ്ങളെ ഒതുക്കാനും തുടങ്ങുന്നു. അവര്ക്ക് ജനാധിപത്യമെന്നാല് തെരഞ്ഞെടുപ്പില് ആസൂത്രിതമായി ഏതെങ്കിലും സൂത്രം പ്രയോഗിച്ച് അധികാരം പിടിച്ചെടുക്കലും അതുകഴിഞ്ഞാല് എല്ലാ ജനാധിപത്യനിയമങ്ങളും കാറ്റില്പ്പറത്തി, ഭരണസംവിധാനത്തില് മുഴുവന് സെല്ഭരണം സ്ഥാപിച്ച്, സ്വേച്ഛാധിപത്യം സ്ഥാപിക്കലുമാണ്, അങ്ങനെ ജനാധിപത്യരീതിയെ പ്രയോജനപ്പെടുത്തി ജനാധിപത്യത്തിന് തുരങ്കം വെയ്ക്കലാണ്. സായുധവിപ്ലവം, വര്ഗ്ഗസമരം തുടങ്ങി ജനാധിപത്യത്തില് സ്ഥാനമില്ലാത്തതും മുമ്പേ തങ്ങള് ഏറ്റെടുത്തതുമായ പരിപാടികള് ഒന്നും അവര് ഒരിക്കലും ഉപേക്ഷിച്ചിട്ടില്ല. സ്വന്തം അണികളോട് ഒരു വാക്കും അന്യരോട് മറ്റൊരു വാക്കും പ്രയോഗിക്കുന്നത് കമ്യൂണിസ്റ്റ് നീതിശാസ്ത്രത്തില് അനുവദിച്ചിട്ടുള്ളതാണ്. |
എം.ജി.എസ്. നാരായണന് | < മുന് പേജ് | അടുത്തത് > |
|---|
-°C 